Pages

Grebaorokorra etiketadun mezuak erakusten. Erakutsi mezu guztiak
Grebaorokorra etiketadun mezuak erakusten. Erakutsi mezu guztiak

2012-04-02

#m29greba erabatekoa izan zen gure herrian. EGUNEKO KRONIKA.


Erabatekoa izan zen grebak gure herrian izan zuen jarraipena, langile zaharrenek ere ez zuten oroitzen halakorik inoiz gurean ikusi izanik. Orain hiru hamarkada General Electrica eta Babacock Wilcox moduko lantegietan eginiko greba luze haietan ere ez zen herrian halako babesik somatu.

ERANTZUNA ERABATEKOA eta TOTALA
Denda eta taberna guztiek itxi zuten, poligonoak geldirik, garraio publikoan zerbitzu minimoak, liburutegia eta ia eskola guztiak itxita. Pertsiana jaitsita esnatu zen Trapagaran joan den ostegunean.

GOIZA SENDO >>>>7:00tan tren geltokian >>>>10:00etan giza katean.
>>>> 7:00. Tren geltokian. Ordu horretan hasi ginen informazio banaketan tren geltokian. Ohi baino jende gutxiago zihoan lanera guk informazio eskuorriak banatzen genituen bitartean. Tren geltokiko prosegur urduri ipini zen eta ertzainak deitu zituen, beltzezko gizonek grebalariak izorratzeko lanean tren geltokitik hurruntzera behartu gintuzten.

>>>> 8:40. Franciscanas de Montpellier. Goizeko azken trena igaroa zen eta herritik itzuli bat ematea erabaki genuen. Guztia itxita zegoen. Franciscanas de Montpellier ikastetxea izan zen greba egin ez zuen eskola bakarra, beraz atean gurasoei eskuorri banaketan jartzea erabaki genuen. Gurasoen harrera ona izan zen.

>>>> 9:10. Udaletxea hartu genuen. Udaletxean izan ziren funtzionari izanagatik greba babestu ez zuten hainbat langile eta politikari, grebaren arrazoiak azaldu eta protestetan parte hartzera gonbidatu genituen langileak. Herri osoa itxita zegoen eta udaletxea herritarren etxea denez udaletxeko balkoitik grebaren aldeko pankarta zintzilikatu genuen.

>>>>9:40 Polikiroldegia. Polikiroldegia irekita zegoen, udaletxetik irten ondoren bertaratzea erabaki genuen. Polikiroldegian sartu orduko langileek esan ziguten grebarekin bat egiten zutela eta berehala itxiko zutela.

>>>> 10:00. Giza katea. Jende multzo polita elkartu ginen goizeko giza katean eta irekiak zeuden taberna eta komertzioz komertzio aritu ginen itxitako taberna eta dendekin elkartasuna aldarrikatuz eta greba egiteko eskatuz. La Habana plazako "salon de juegos" eta bar "la esquina" izan ziren tabernetako bi, arrazoiak azaldu eta gehiena itxita zegoela ikusita grebarekin bat egin eta ixtea erabaki zuten. Ileak ileapaindegia eta 1º de mayoko movistar denda izan ziren goizeko piketearen ostean itxi zuten beste bi.

>>>> 11:15 Consum itxi zen. Eroski-Consum irekita zegoen eta giza katean bertaratzea erabaki genuen. Azaldu genien langileei herriko denda txiki guztiak itxita zeudela eta ez zitzaigula justua iruditzen txikiek itxi zutela baliatuz saltokirik handiena irekirik mantentzea. Langileek barne bilera bat egin zuten eta ixtea erabaki zuten.

>>>> 11:45 igeritokiak itxi zituzten. Giza katea bertaratu orduko, polikiroldegia bezala itxi zituzten igeritokiak.

>>>>12:00etan Kontzentrazioa. "Lan erreforma eta gizarte murrizketen kontra" kontzentrazioa burutu zen Trapagaranen. arrakastatsua izan zen, 130 pertsona inguru elkartu ginen.

>>>>13:10. Atsegia okindegiko bataila. Laugarren aldia zen Atsegia okindegira joaten ginela. Grebalariak hurbildu eta berehala ixten zuen, baina joan orduko berriz ireki. Azkenean okindegira sartu eta langileekin hitz egin ondoren jarrera berarekin segitzen zutela ikusita atean sentada bat egitea erabaki genuen. Okindegia itxita mantendu zen egun osoa.

>>>>17:00. Kotxe karabana. 20 kotxe inguru elkartu ginen kotxe karaban egiteko. Auzoz auzo ibili ginen. Herrigune osoa itxita zegoen, Ugarten taberna batzuk bai eta besteak ez, Larreineta osorik eta Arboleda ere bai erdizka.

>>>> 19:00 Manifestazioa. Gazteok inoiz oroitzen dugun manifestazio handiena izan zen arratsaldekoa. 600 lagun baino gehiago elkartu ginen lan erreforma eta murrizketa sozialen aurka.

HEMENDIK AURRERA ZER?
Lehenbizi itxi zuten merkatari eta taberna guztiei eskerrak eman behar dizkiegu. Herriak oso ondo erantzun zuen, argi esan genuen ez gaudela gobernua hartzen ari den neurri ekonomikoekin ados. Jende asko eta oso ezberdina elkartu ginen egun osoan zehar eta hori kezka dagoen seinale da.

Orain balorazioa egiteko garaia da, greba antolatzeko sortu dugun bilguneak ondo egin du bere lana, aurrera begira sozial arloaz kezkatuta gauden jendearen bilgune bat izan daiteke sortu duguna. Batean edo bestean balorazio garaia da. ESKERRIK ASKO TRAPAGARAN! ez zuten alferrik esaten lehengo zaharrek... SANGRE MINERA, SEMILLA GUERRILLERA!


2012-03-27

GREBARA goaz! Ostegunerako guzia dago prest herrian.



Grebara goaz! Ostegunerako guztia dago prest herrian. Egoera larri honen aurrean mobilizazioak handiak izango direla aurreikusten da. Merkatari eta tabernari askok esan dute itxiko dutela eta zenbaitzuek atean dute jarrita jada grebako kartela. Guk greba eguneko argazki eta datuen kronika egingo dugu http://trapagarangreban.tk/ webgunean. Greba eguna bertan da, goazen kalera, goazen protestara!

GREBA EGUNERAKO MOBILIZAZIOAK TRAPAGARANEN

>>>>7:00 Pikete informatiboak tren geltokian.

>>>>10:00 GIZA KATEA Arkotxa plaza .

>>>>12:00 KONTZENTRAZIOA
Maiatzaren 1. erloju berrian (Boulevard taberna ondoan).

>>>>17:00 KOTXE KARABANA polikiroldegiko parking-etik.

>>>>19:00 MANIFESTAZIOA
Maiatzaren 1. erloju berritik (Boulevard taberna paretik)

2012-03-20

Grebarako deia zabaltzeko propaganda hitzorduak egin dira herrian.


Lan eskubideak murriztuko dituzte, despidoak erraztu, aldi baterakotasuna zabaldu eta unean unean kontratuak zabaldu. Osasungintza pribatizatzeko intentzioak direla batean, hezkuntzako murrizketak berriz bestean, zerbitzu sozialen desagerketa eta jubilazio adina 67 urtera luzatzea. Badago grebara joateko motiborik.

Trapagaranen M29ko greba antolatzeko batzorde bat osatu dugu, langabetuen asanblada, gaztetxeko gazteak, jende independientea, langile eta jubilatu zenbaitek osatua. Greba deia zabaldu nahi dugu herrian. Horretarako propaganda banatzeko ostiral eta larunbaterako zita egina dugu. ETORRI eta batu grebari!

OSTIRALA martxoak 23 19:30-20:30 bitarte BBK-Caixa gurutzean
LARUNBATA martxoak 24 12:30-14:00 bitarte BBK-Caixa gurutzean

2012-03-07

M29ko GREBA OROKORRA antolatzeko batzorde ireki bat sortuko da bihar.

Krisiak sektore asko ukitzen ditu, langileak, langabetuak, ikasleak, merkatariak, sektore publikoko erabiltzaileak. Elkarrekin lotuta doa guztia. Krisiaren aurrean gobernuak hartzen ari diren neurriek langileen eskubideak murriztuko dituen lan erreforma ekartzen du, unibertsitate eta hezkuntzan murrizketak, osasungintzaren pribatizazioa, komertzioen igandeetan irekitzea... Bankuak eta mekratuak babesten dituzte gobernuek, despidoak erraztu, enpresarioei alde jokatu. Neurri horiek guztiek ordea, populazioaren gehiengoari zuzenean eragiten digute.

Europa osoa mugitzen hasia da, 15M, ikasleen matxinadak (Valentzia, Bartzelona...). Trapagaranen ere mugitzeko garaia da. Nola uztartu ditzakegu ikuspegi guzti horiek eta M29ko greba gure herrian ahalik eta gehien zabaldu? Langabetuen asanbladarekin batera M29ko greba antolatzeko batzorde ireki bat sortzea pentsatu dugu horretarako. Ikasle, langabetu, gazte, sindikalista, merkatari... elkartzea da asmoa. guztiok elkarrekin herrira begirako planteamendu txukun bat egitea. Animatu eta etorri!
MARTXOAK 8 OSTEGUNA
arratsaldeko 19:30etan elkarteak biltzen diren txokoan ANBULATEGI ZAHARREAN

Honez gain bertako iritzi, deialdi eta greba orokorraren notizien berri emateko atari berri bat ireki dugu interneten, bertatik zabalduko ditugu grebaren gaineko notiziak eta iritziak:

2011-01-27

GREBA egunaz: Kronika, galderak eta autokritika.

Grebatik gatoz. Bilbora jaitsi gara eguerdiko manifara eta burura etorri zaizkigu Euskal Herriko lehenbiziko grebak. Arboledatik, Trianotik, Gallarta, Ortuellatik Bilbora jaisten ziren manifestazioetara milaka meatzari, guk gaur egin dugun bezala, euren eskubideen alde protestatzera. Arboledan egin zen Euskal Herriko lehenbiziko greba. 1886ko maiatzaren 1a zen, 25.000 pertsona manifestatu ziren Bilbon langileen egunean. Arratsaldeko ekitaldi nagusia Arboledan egin zen eta 4.000 meatzari bildu ziren herriko frontoian. Mobilizazio horren ondorioz Arboledako komite sozialistako 5 meatzari lanetik kanporatu zituzten.
1886ko maiatzaren 13an despidoen kontra greban hasi ziren Arboledako Orconera konpainiako 200 meatzari. Berehala izan zuen zabalpena grebak, meatzariak meatzez meatz joan ziren grebarako deia zabaltzen eta ordu gutxitan 5.000 meatzari ari ziren protestetan Arboledan. Mendietatik Gallarta eta Ortuellara jaitsi ziren eta iluntzerako beste 3.000 langile gehiago lotu ziren grebari. Gauerako meatzalde guztia geldirik zegoen. Grebak hurrengo egunetan jarraitu zuen, ejerzitoa mobilizatu behar izan zen eta Bizkaia estado de sition ipini zuen gobernuak. 20.000 langile ibili ziren mobilizazioetan. (Lehen grebari buruzko kronika osoa irakurtzeko hemen: Arboleda 1886- dokumentuaren 7-8 orrialdean)

Gaurkoak ordea ez du ordukoaren antzik izan. Jendetza bildugara Bilbon egia da, manifa itzela izan da baina komertzio gehienak irekita gure herrietan, enpresa txiki, tailer eta poligonoetan berriz jarraipen irregularra. Langile tradizioa badu gure eskualdeak, frankismoan ere bai gure inguruko lantegietan protesta handiak gertatu ziren. Gainera sozioekonomikoki gure eskualdeko baldintzak grebarako baldintzak dira, Euskal Herri mailako eskualde prekarioenetakoa, enpresa handiak krisian eta desagertzeko zorian, enpresa txiki, kooperatiba eta tailerren sarea ez da Euskal Herriko beste eskualdeetan (Goierri, Deba bailara...) bezain trinkoa, langabezia tasa altuagoak, bizi kalitate eskasagoa... Hori dugu gurean errealitate. Orduan zergatik gure auzokoak, gure herrikideak ez dira lotzen grebari?


Batzuek esaten dute dela gure eskualdean gehiengoz ez garelako abertzale. Baina orduan zergatik ez du inork itxi CCOO eta UGT sindikatu españolen iraialren 29ko greban? CCOO eta UGT aspalditik daude gurean, sustraiak sakon dituzte gure eskualdean eta ordea ez dute espainia mailara deitua den greba orokor batean inolako jarraipenik izatea lortu. Zer gertatzen da beraz?

Komertzioz komertzio pasatzen garenean merkatariek esaten dute autonomoak direla, ez dutela haien burua sindikatuen deialdiari lotua ikusten, ez dela haien arazoa.... Ez dira langile klasearen parte sentitzen hori nahiko argi somatzen da. Krisiaren kontura espainiako gobernua hartzen ari den neurriez hitz egiten dugunean ordea gobernuaren neurrien erabat kontra azaltzen dira. Orduan zer gertatzen da?


Hainbeste espazio irabazi digu agintarien sistema ofizialak, nun nor garen ahaztua dugun. Indibidualismoa barruraino sartuta daukagu, bizi-iraun ahal izatearekin konformatzen gara, eta galdu dugu errebeldia, galdu herritar klase konzientzia. Politiko profesionalek enpresa handien eta bankuen alde ari dira etengabe. Jauntxoak ez dira geuregatik arituko, gure interesak, herritar xumeen interesak guk geuk defendatu behar ditugu.

Guk ere, greban ari garenok, Euskal Herri aske eta berria nahi dugunok badauzkagu akatsak. Herritar sektoreen konpaktazioa landu behar dugu, merkatariz merkatari, langileak, ikasleak, gure herrian, gure auzoan. Bidea egin behar dugu, lokaletik globalera. Herritar sektoreen interesen alde, herri klase konzientzia sortuz, landuz eta zabalduz. Jauntxoen aurrean etorkizuneko herritarren meatzaldea irabazteko, borroka sozialak, greba orokorrak aurrera eramateko baldintzak sortzeko. Badugu lan eta badugu bide, dendaz denda, kalez kale, auzoz auzo, ahoz aho. Arboledako lehen grebalari horiek aldarrikatzen zuten bezala: "Viva la Zona Minera! Abajo los cuarteles! Viva la unión obrera! "

2011-01-26

GREBARA!

LiveStream: GREBA OROKORRA TB


Greban gaude, kalean gaude, langileon eskubideen alde, herriaren alde. Gobernutik datoz erasoka, lan erreformak, pentsioen erreforma oraingoan. Beti herritar xumeen eskubideen kontra, beti banku eta enpresa handien interesen alde. Gizarte justuago bat nahi dugu, elite ekonomikoen interesen aurretik, herritarren gehiengoaren interesak dituena oinarri. Horregatik goaz kalera , horregatik kalean gaude, herritarren Euskal Herria irabazteko. Elkartasunez gaude kalean Munduko Federazio Intersindikalak babesa adierazi dio hemengo grebari. koloretako munduan.

GREBA OROKORRA INFORMAZIOA ZUZENEAN
Greba Euskal Herrian: http://greba.euskalherrian.info/
Tas-Tas irratia: http://tas-tas.org/streaming.html

2011-01-25

Urtarrilak 27: GREBA OROKORRA.

Urtarrilak 27, datorren osteguna eta greba orokorrerako deialdia egin dute euskal sindikatuek. Asko dira azken urteotako krisi kontestuan Europan izan diren herritarren protesta eta erresistentzia mugimenduak. Nabarmenak Frantziako jubilazio erreformaren aurka 2010eko neguan emandakoak eta Greziako erreforma guztien aurka ematen ari direnak. Egoera berdina da guztietan, bankuen espekulazioaren ondorioz sortutako krisia herritarren eskubideak txikiagotuz konpondu nahi dute. Horrela etorri da Espainiako gobernuaren aldetik langileen eskubideak txikiagotzen dituen lan erreforma eta orain pentsioen erreforma. Horren kontra deitu dute euskal sindikatuek osteguneko greba.
HERRIKOLORE 62.irratsaioa


ZER EKARRIKO DU PENTSIOEN ERREFORMAK?
-Jubilatzeko adina 65 urtetik 67ra pasatzea.
-Pentsio izateko kotizazio urtea handituko da 15 urtetik 18ra.
-Pentsio osoaren %100 kobratzeko 35 urte lanean egotetik 41era pasatuko da
.

Ondorioa da bankuek sortutako krisia herritarrek ordainduko dugula. Lan erreforma, IVA, argia eta horrelako zergen igoera, jubilazioak txartzea. Bitartean politikariek enpresari handien morroi bankuei diru laguntzak ematen, kasta politiko bat bezala bizitzen... (Soldata itzelak eta bizi osorako, jubilazio altuenak...). Argi eta garbi badago protestarako motiborik.

ZER
GERTATZEN DA SINDIKATU ESPAINOLEKIN? (CCOO eta UGT)
Normalean esaten da erdi mailako klaseak direla gehiengo Europako gizarteetan, herritar xumeak. Orain ordea jende gehienaren eskubideak geldituko dira bazterrean, politiko handiak, enpresari aberatsak eta bankariek beti bezala aberasten jarrai dezaten. Gainera Espainia da Europan krisia gehien jasaten ari den herrialdeetariko bat, industriarik gabe, administrazioa zorretan eta leku batzuetan (andaluzian) %40ko langabezia tasekin. Zergatik espainiako sindikatuek ez dute protestatzen? Espainiako sindikatuak gobernuaren subentzioen menpe bizi dira, dirutza ikaragarria jasotzen dute gobernutik eta Europako formazio fondoetatik. Diru honekin bulego, teknikari eta liberatu sare erraldoia sortu dute baina hau guztia ordaintzeko estatuaren diruaren beharra dute. Gobernuaren menpe daude eta horregatik onartu eta sinatuko dute Espainiako gobernuaren jubilazio erreforma. Horregatik ez dute sinesgarritasunik, erosita daude.

EUSKAL HERRIAN ZER?

Euskal Herrian gehiengo sindikalak ez du espainolek duten menpekotasun ekonomikorik, horregatik mugitzen da, horren erakusgarri dira azken bi urteotan egindako 3 grebak eta horregatik du euskal sindikalgintzak izugarrizko potentzialitatea. Aurreko grebekin ordea badago zer hausnartua. Lantegiak eta poligonoak etxi ziren, milaka langile joan ziren manifestazioetara, ez zen ordea izan borroka greba bat. Herri askotan komertzioak irekita, eskoletan jarraikortasuna ezeberdina, Euskal Herriko lurralde gehienetan bezala. Gero eskubide sozialen aldeko dinamikek greba puntualez aparte ez dute jarraikortasunik.

BAdira aukerak, sindikalgintza borrokalaria daukagu Euskal Herrian baina sindikalgintzak iraganeko sinesgarritasuna irabazi behar du. Sindikalgintza ezin da izan laneko seguro moduko bat. Sindikatuen dinamikek herritar sekotre guztiak bildu behar dituzte, merkatariak, langileak, kooperatiba eta tailer txikiak eta ikasleak. Merkatariengana, eskoletara, osasun etxera, goazenean zailtasunak ditugu grebara lotzeko, herritar sektorearen parte sentiarazi behar ditugu! Borroka sozialean kontzientziatu, antolatu eta bildu. Euskal Herrian gehiengo erabaki potoloak enpresari handien bulegoetan eta haien morroi diren alderdien egoitzetan ematen badira ere, gu gara gehiengo, irabazi dezagun kalea, irabazi dezagun gehiengoaren interesentzat hobea izango den Euskal Herria.

Lantokitik kanpo lekua behar du sindikalgintzak, gure auzo kaleetan. Etorkizuna libre dator eta aukera guztiak libre, agian ostegunekoarekin ez dugu jubilazio erreformaren geldiaraztea irabaziko, baina ez gaude herriaren aurka doazen erreformekin ados. Ez gaude bankuen eta jauntxoen aldeko erreformekin ados. Asko gara, gehiengoa gara eta kalera irtengo gara. Gainera etorkizuneko euskal herritar batasun borrokalari berri horren sortze bidean urrats bat gehiago izango da. Ostegunean gu bagoaz kalera. Has gaitezen, gure kaletik, auzotik, herritik, herri botere bidean! URTARRILAK 27 GREBA OROKORRA!

2010-10-19

JUBILAZIOAK 67 Espainian, 62 Frantzian, 58 Bolivian


Berriz ere greba eguna gaurkoan Frantses estatuan. 9.a aurten, 9 greba egun. Tren eta garraiobideak geldirik, lizeo eta institutuak itxiak eta blokeaturik, manifak hiri handienetan eta milaka eta milaka jende kalean. Jubilazioa 60 urtetik 62 urtera igon nahi duela Sarkozyren gobernuak eta uda aurretik hasiak zituzten sindikatuek lehenbiziko mobilizazioak. Lapurdi, Baxe Nafarroa eta Xiberuan ere izan du grebak eraginik eta 10.000 lagun inguru bildu dira Baionako goizeko manifan.

Okerrik ezean 2 egun barru dira jubilazioa 62 urtera atzeratuko duen legea onartzekoak Frantses senatuan, langile eta herri mugimenduek ordea hordago! Legea onartu - ez onartu mobilizazioa handitzea erabaki dute: Frantzian dauden 12 petroleo refineriak blokeatzen ari dira uneon. Egunak dira ez dela kamioirik irteten findegietatik eta hasi da gasoleo eta erregai falta somatzen bazterretan. Sarkozyk ere enbido! eta blokatzeak beren borondatez uzten ez badituzte indarrez bidea garbituko duela aipatu zuen atzo lehen aldiz. Botereak elkarrizketa beharrean beti errepresioa aurretik!

Zer pentsatua ematen du guzti honek gurean. Ados Euskal Herrian bi estaduren artean zatituak gaudela. Ados LAB sindikatua, Korsikar, Bretoi eta Guadalupe zein Reunioneko sindikatu abertzaleak bezala frantses intersindikalak antolatzen dituen mobizilaziotatik baztertuak direla CFDT-ren aginduz. Sindikatu unionistentzat noski minoriak beti radikalegiak omen! Ados ere sindikatu burokratizaturik bada hori frantzian dela, Bordeleko CGTren egoitza ikusi besterik ez da behar! Baina mobilizazio horietan beste zerbait sumatzen da. Asanblada irekien bidez erabakitzen da mobilizazioen jarraipena, ikusten ditugu ikasleak, langileak edo langabetuak, merkatari eta irakasleak, sindikatu ezberdinetakoak, mugimendu ezberdinetakoak elkar eztabaidan. Irabazi edo gal, legeak gaindituko dituen edo haiek legea gaindituko duen ez dakigu baina dudarik ez da halako mugimenduek konzientzia sorrarazten dutela jendartean. Gizartea emendarazten dutela posizio aurrerazaleagotara.

Zer esan ordea hemen izan ditugun greba orokorrez? 65 urtetik 67ra jubilazio adina igoko dutela
izan dira 2 greba deialdi orokor Araba, Bizkaia, Gipuzkoa eta Nafarroan. Kalean ordea ez da horren arrabotsik entzuten, eguna heldu da eta heldu bezala iragan. Eztabaida gutxi gurean, saltsarik ez kalean, mobilizazioak burutzeko ardurak ere "buruen" eskuetan. Zorua jausten da gure urratsen azpietan.

Bitartean Evoren Bolivian jubilazio adina 65 urtetik 58ra jaitsi dute eta lan gogorretan ari direnentzat ordea (meatzariak kasu...) 56 urtetara. Gutxiago irabaziko dute, herrialde azpi garatua deitzen ditugu, datuak ikusita galdera dator segidan ia nor den hemen "garatua".

2010-06-29

TRAPAGARANEK GREBAREKIN BAT EGIN DU

Goizean goizetik greba nabaritu da, ez da egon autobusik ezta funikularrik ere. Autobus geltokietan lanera zihoan jende gutxi egon da. Egunsentiarekin batera hasi dira piketeak poligonoetan. lantokietan grebak jarraipen zabala izan du.

Goizeko zortziak aldean Aurrera industrialdean % 60 inguruk itxi du. Ugarteko Trapaga elkartegian 16 enpresatik 9k bat egin dute grebarekin. Eta Granada poligonoan oraindik gehiago, kotxerik ez, bakarrik 11 enpresa baitzeuden irekita. Nervacero, ABB trafo eta Babcock Wilcox bezalako enpresa handietako jarripnea zein izan den jakiteko sindikatuen balorazioen zain gaude.

Irakaskuntzan, osasungintzan eta polikiroldegian ez du izan jarraipen handirik grebak, liburutegia, ordea, itxita dago. SuperSurreko obretako lanetan berriz grebak ez du eraginik izan.

Herrian nabarmentzekoa izan da merkatariek egin duten bi orduko geldialdia. Jarraipen zabala eduki du, % 70-80k artean itxi baitu. Lonja batzuek ere grebari atxiimendua eman diote haien atean grebako kartela ipiniz. Hemendik aurrera bide berri bat dugu aurrean, elkarlanean, indar metaketan, herri mailan, langile,langabetu, ikasle, lonjero, merkatari... sozial arazoez hitzegiteko, arazo ekonomikoez hitz egiteko. Beste mundu bat posible da! Adi!

GREBAKO ARGAZKIAK: Picasa GrebaTrapagaran

EGUERDIKO INFORMATIBOAK: Eguzki / Tas tas/HalaBedi irratiak
Euskal Herria

Bilbo (tas tas irratia)







2010-06-28

Dana prest Trapagaranen biharko GREBA OROKORRERAKO


Euskal Herriko sindikatuen gehiengoak (ELA, LAB, ESK, STEE, HIRU, EHNE, CCOO, CNT y CGT) gobernu espainolak ezarri nahi dituen krisiaren aurkako neurriak geldiarazi asmoz Greba Orokorrerako deia egin du biharko. Gobernu Espainolak krisiaren pisu guztia langile eta herritarren gain ezarri nahi du. Lan erreforma, pentsioen erreforma, IVA eta argindarraren prezioa igotzea, osasun eta hezkuntza zerbitzuak murriztea....

Elkarte eta talde asko lotu dira grebari eta deialdia zabaldu dute, Bizkaiko langabetuen asanblada, Nafarroako jubilatuen elkartea, 900 enpresa komite baino gehiago, Ezker Abertzalea, Aralar, Alternatiba eta EA alderdiak.

Trapagaran ere prest dago grebarako. Egun osoko greba egingo da lantoki eta poligonoetan eta komertzioak 2 orduko "paro"arekin lotuko dira grebara(11:00tatik 13:00era.) Gainera kontzentrazioa egingo da herrian:

KONZENTRAZIOA
No a la reforma laboral
Eskubide sozial murrizketarik ez!
11:30tan Caja Rural aurrean
Bihar grebari buruzko segimendua egingo dugu argazki,kronika, balorazio... Trapagarango informazioa gure blogean in live! KALERA! adi!!

2010-06-24

GREBA ARRAKASTATSUA: azken aldiko manifestazio handiena Baionan.

Greba eguna deituta zegoen gaur Frantses Estatuan. Pentsioen eta jubilazio adinaren erreforma burutu nahi du Sarkozyren gobernua. Jubilazioa ("erretreta" Lapurdiko euskaran) 62 urtera igo nahi du Frantses gobernuak eta pentsio osoa jasotzeko 41 urtez lanean egotea ezarri.

Sindikatu guztiek bat egin dute greba deialdiarekin eta oso arrakastatsua izan da:10.000 pertsona bildu dira Baionako manifan. Lapurdiko 3 hospital handietako langileak bertan izan dira, baita Lapurdiko enpresa handienetako langileak ere, Turbomeca, Dassault eta Angeluko Carrefourreko langileak esaterako. Iparraldeko 27 ikastoletatik 24 itxita egon dira eta autobusen erdia ibili da.

Antzeratsu gabiltza gurean ere bai. Datorren astearterako greba orokor deialdia egin dute ELA, LAB, ESK, EILAS, EHNE, HIRU, CCOO, CNT eta CGT sindikatuek. Hainbat langabetu asanbladek ere dei egin dute. Adi trapagarango deialdiei!

Igandean 19:00tan asanblada dago gaztetxean gazte mailan grebako agitazio, propaganda lanak banatzeko. Etorri eta parte hartu! LOTU GREBARI!

2010-06-16

CCOOk ere 29ko GREBA OROKORRERA DEITU DU.


Gaur onartu du Espainiako Gobernuak despidoa errazten duen lan erreforma eta herritarren eskubideen urraketan segitzen du. Langile eta herritar sektoreen gain jartzen ari da gobernua krisiaren pisu guztia. Langabezia tasa ikaragarriak (824 langabetu Trapagaranen %12), pentsioen erreforma, jubilazioa 67 urtera igotzea, IVAren garestitzea, zerbitzu sozialak eskastea, osakidetza eta hezkuntzako murrizketak, argindarraren prezioa %4 igotzea...

Gure gurasoek langile borrokaz lorturiko aurrerapen sozial guztiak daude kolokan. Grezian hilabeteak daramatzate, guk ere ekin dezagun. ELA, LAB, ESK, EHNE, EILAS eta HIRUk ekainaren 29rako GREBA OROKORRA deitu dute. CCOOk bere kabuz baina grebara ere deitu du. LANGILE, EMAKUME, LANGABETU, EMIGRANTE, IKASLE.... HERRIA EZ DAGO SALGAI! ek 29 KALERA! adi Trapagarango deialdiei!!
INFO+:
TXIKI MUÑOZ (ELA)








AINHOA ETXAIDE (LAB)


Sotiris Zarianopoulos (PAME sindikatua -Grezia)
«Llamamos a todos los trabajadores a alzarse contra el poder capitalista»

2010-06-13

EKAINAK 29 GREBA OROKORRA EUSKAL HERRIAN


Euskal gehiengo sindikalak (ELA-LAB-ESK-EHNE-HIRU-STEE EILASek) atzo Bilbonegindako manifestazioaren ondoren EKAINAren 29rako GREBA OROKORRERA deitu du. Uda da baina negua ari du kalean. Krisi ekonomikoa. Lanpostuak kolokan, langabezia, baldintza txarrak, desastre ekologikoa... Sistemak porrot egin du. Aberastasunak gutxiren eskuan eta gero eta aberatsago, munduaren 3/4ak aldiz, miseria gorrian, pobrezia gehiago. Neurririk gabeko kontsumoan oinarritzen den ereduak ez du gehiago ematen, ez da herritarren ongizatea bermatzeko gai. Beste eredu berri baten beharra dugu. Zerbitzutan oinarrituko dena, jendartearen ongizatean, agian hainbeste kontsumituko ez duena baina bai guztiontzako aski izango duena.

Europako agintariak ordea ez doaz norabide horretan eta bata bestearen atzetik ari dira egoera nola edo hala salbatu eta partxeekin konpondu nahiean. Leku guztietan hasi dira lan erreformak planteatzen, gure aurrekoek borrokaz lorturiko eskubideak desagertaraztea planteatuz. Krisia sortu duten banku eta espekuladoreei dirua injektatzen diete eta langile-herritar xumeen gainean jartzen dute krisia konpontzeko ardura osoa. Grezia bor-bor sartu zen 2010ean, kaleak sutan, langileria ez gaude eskubideetan atzerapausoak onartzeko prest. 29an euskal herria masiboki kalera! PEOPLES OF EUROPE RISE UP!

29an denok kalera! XUTIK TRAPAGARAN!
Adi greba antolatzeko deialdira! Guztion inplikazioa beharrezkoa da!

INFO+: http://www.labsindikatua.org/sarrera/albisteak/folder_es/898

2009-05-21

TRAPAGARAN: herria bizirik dago!

Arrakastatsua izan da gaurko greba eguna Euskal Herrian, arrakastatsua gurean. Ez, Trapagaran ez da usurbil, ez gara Leitzan bizi, ez Ondarru, ez Lesaka eta gure herrian zabala izan da krisiaren aurrean langile, ikasle, irakasle eta merkatariek, herriak orohar emaniko erantzuna. Azken hamarkadako deialdi arrakastatsuena. Gu aldiz twitter bidez, blog bidez, argazki bidez aritu gara www.grebaorokorra.info -n gure herriko segimendua egiten. Aritu gara Tas-Tas bidez, eta grebaorokorra.info bidez Euskal Herriko berri jarraitzen. Hartzen, ematen, ikasten. Herri kazetaritza, kale kantoitik mundura.


Balorazioetan sartuz, gure herrian, irakaskuntzan 3 irakasletik 1ek grebarekin bat egin du, garraiobideetan Renfe salbu gainontzekoak zerbitzu minimoetan aritu dira (Funikularra) edo ordutegi murritzagoekin (Bizkaibus). Poligono eta tailer txikietan goizean goizetik piketeak izan dira eta mordoxka izan dira itxitakoak. Granada poligonoan nabarmena izan da bertan zegoen kotxe kopurua ohikoa baino txikiagoa zela. Enpresa handietan mugimendu gutxi (ABB, Babckok... CCOO etA UGT nagusi!) Amaitzeko merkatarien erdiak inguruk bat egin du Trapagaranen ordu baterako planteatua zegoen paroarekin. Krisiaren aurrean herritarron eskubideon defentsan. Langileon defentsan.
TRAPAGARANGO ARGAZKI GUZTIAK IKUSGAI:

Zaila dugu gure ingurua. Desegituratuak gure herriak. Nortasuna zero. Indibidualismoa nagusi. Baina Euskal Herriko langile mugimenduaren sehaska izan zenak ez du bere jatorria ahaztu. Ez gara merkatal zentru handien artean hilko. Sugarrak pizturik darrai. Gu ere mende hasierako meatzarien antzera Bilbora jaitsi gara. Barrenarik gabe, pikotxik gabe, baina kapitalismoaren krisialdia guk ordaindu nahi ez dugula ozen aldarrikatzera. Ez dugu kapitalismoaren birfundaziorik nahi. Sistema ekonomiko berria. Aberastasun banaketa. Justua. Guztiona. Guztiontzat. Aterik ate, lagunik lagun Trapagaran berria, Trapagaran HERRIA, ereiten gabiltza. AURRERA eta ZORIONAK TRAPAGARAN! El pueblo unido...

TRAPAGARANGO jarraipena #grebaorokorra.infon

http://ttiki.com/3655

Blog honek M21eko grebarekin bat egiten du!

Trapagarango Basetxeko gazteok Euskal Herriko langileriarekin bat eginik aktiboki gaurko greban parte hartzen ari gara. Gobernuek bultzatu nahi duten kapitalismo berriaren aurka, sistema ekonomiko justuago baten alde. Aberastasunaren banaketaren alde. ERE eta despidoen aurka. Eskubide sozialen alde... Gaur egun osoa kalean izango gara. Zeu ere lotu grebari!


11:30etan KONTZENTRAZIOA
Caja Rural parean

11:30 - 14:00 Greba Orokorra SOUND SYSTEM

18:30etan MANIFESTAZIOA
Barakaldoko Bide Oneratik

Egunaren segimendua: www.grebaorokorra.info

2009-05-19

GREBARA GOAZ. Badira 11 arrazoi.



Krisia han eta hemen, krisia hemen eta hor. Dirua gutxi batzuen eskuetara, kontsumo krisia eta lantokiak produzitu ezinik. Hau ikusirik hainbat gobernuk lan baldintzak eta eskubideak murrizteko hautua egin dute. Enpresak eta bankuak diruz laguntzekoa. Ondorioa:

-141.000 langabe Hego Euskal Herrian.
-3tik 1 langabezia laguntzarik gabe.
-Egunero 428 lanpostu gutxiago.
-4.010.700 langabetu Espainian.
Gure inguruan:
- LEHOIKO BIHOTZ (Gallarta) eta ELECQUI (Trapagaran) lantokien ixtea eta 280 lanposturen galera.
-Gallartako CA DE PAZ enpresaren itxiera eta 100 lanposturen galera.
-Trapagarango FERSINT lantokia (100 langile) lehiketara ateratzea.
-PRODUCTOS TUBULARES, ACB, CNC eta CALDEPESAn EREak.

Europako hainbat herritan (Frantzia, Grezia...) hasi dira protestak, geurean ere bada garaia! Basetxe gaztetxetik goizean goizetik kalean gara, baditugu mila arrazoi, M21 LOTU zeu ere GREBAra!

TRAPAGARANEN
11:30etan KONTZENTRAZIOA
Caja Rural ondoko plazan

1-LAN DUINA GUZTIONTZAT: Enpresen ixteari STOP, EREak STOP, lan prekarioari STOP, lan eskubide murrizketarik ez. Lan duina guztiontzat.
2-ABERASTASUNAREN BANAKETA: Euskal Herrian sorturiko aberastasuna herritar guztiontzako ongizatea bilatzera bideratu behar da. Kalitatezko zerbitzu publikoak eta babes soziala.
3-EKONOMIAREN DEMOKRATIZAZIOA: Patronalaren inposaketari STOP. Gobernuek herritarren zerbitzura egon behar dute ez enpresarien zerbitzura.
4-ERABAKITZEKO ESKUBIDEA: Eredu sozial eta ekonomiko berria Euskal Herrian bertan erabakitzeko eskubidea.

2009-05-17

Trapagarango gaztetxeak: M21eko GREBAREKIN BAT!

Krisi ekonomikoa han eta hemen, krisi ekonomikoa gure etxeko atean. Horren ondorioz despido merkeak, ERE, lanbaldintzen okertzea. Horrela gobernuek krisi honen kostua langileon bizkar jarri nahi dute, enpresari eta bankariak zuzenki diruz lagunduz. Honek Europa osoan langile protestak piztu ditu, Frantziako sindikatuen mugimendu bateratuak, Greziakoak, italia... Euskal HErrira ere heldu da protesta sugarra. Datorren ostegunean, maiatzak 21, GREBA OROKORRA deitu du euskal gehiengo sindikalak (ELA, LAB, STEE-EILAS, ESK, EHNE etA HIRUk) krisiaren aurka, langileen eskubideen alde!.

Trapagarango gaztetxean ere bat egin dugu grebaren oinarri eta herriko ekimenekin. Beraz maiatzaren 21ean kalean egongo gara greba mobilizazio barnetik, poligono eta ikastetxeetatik zuzenean herritik eta herriarentzat gertaeretaz informatuz. Twitter,bideogintza, kronikagintza eta sarea izango dira gure tresnak. Sarea eta www.grebaorokorra.info webgunea, hor izango baita egun osoan zehar, zuzenean eta grebari buruz era alternatiboan, herriaren ahotsetik informatzeko aukera.

Trapagarango ekimenei lotzen gatzaizkie. Herritar, langileen eskubideen alde, heldu borrokari!

MAIATZAK 18, astelena
20:00etan Gaztetxean
HITZALDIA: Krisi ekonomikoak munduan, haien eragin historikoa + eztabaida. Jose Ramon Castaños "Troglo"

MAIATZAK 21, GREBA OROKORRA
11:30etan KONTZENTRAZIOA Trapagaranen
Caja Rural ondoko plazan

2009-04-20

Maiatzaren 21a: GREBA OROKORRA

Maiatzaren 21erako GREBA OROKORRA deitu dute Euskal Herriko sindikatuek. Herria arituko da kalean, herria plazetan, ikastetxe huts, lantoki eta baserri bazterretan. Krisiaren aurrean erantzunkizunak, konponbidea eta babesa eskatuz. Gobernuek nahiko lan dute dirudunak lagunduz, herritarren gain kargatzen dute haiek sortutako krisiaren kostua, banku, multinazional eta enpresariak babestuz. Bestaldean aldiz, langile, baserritar, langabetu zein ikasle, guztiok baldintza okerragoetan, gehiago langabezian, gehiago ERE-en menpean, gehiago bankuen morrontzapean gauden bitartean.

ELA, LAB, ESK, EILAS, EHNE, HIRU sindikatuek bota dute harria, euren erantzukizunari helduz herritarren eskubideen defentsan, gizarte justuago baten defentsan jo dute deialdia.

Komunikazio mundutik ere heldu diote hordagoari, eta greba orokorrari jarraipen zuzena egiteko, herritik sorturiko komunikazio proiektua atxikitu zaio ekimenari. Meatzaldean ere hortan arituko gara, eta zu zeu ere izan zaitezke GO kazetari! Herriak egin, borrokatu, sortu eta zabaldu!
Sindikatu españolistek berriz, beren jarrera azaldu dute. M21erako lehen kartelak kaleratu dituzte. Nahiago dute agintarien eskutik jaten segitu, estatuaren diru laguntzekin haien barne burokrazia elikatu, benetan herritar xumeen beharrak borrokatu baino. Izan ere kalean hotz egiten du...