Pages

inauteria etiketadun mezuak erakusten. Erakutsi mezu guztiak
inauteria etiketadun mezuak erakusten. Erakutsi mezu guztiak

2012-02-28

LARUNBATEAN carrascoliendas ordaintzeko bertsoafaria gaztetxean.



Ederki pasatu genuen larunbateko carrascoliendas egunean, orain gastuak ordaintzea falta da. Horretarako antolatu dugu bertso afaria datorren larunbaterako gaztetxean.
Bertsolariekin poteoa 20:00etan hasiko da "el batasen" lonjatik. Lonjaz lonja gaztetxera joan eta 22:00ak aldean afaria egiteko. Osteguna bitartean egongo dira afariko txartelak salgai. Animatu, ederki pasa eta guztion artean ordain dezagun carrascoliendas!!

BERTSO AFARIA
FREDI PAIA eta BEÑAT UGARTETXEA bertsolariekin
Martxoak 3 larunbata, 22:00etan gaztetxean
afariko txartelak 12 eurotan salgai
La Pinta, Ilargi, Muga, Gernikako eta Itsaso tabernetan

2012-02-27

CARRASCOLIENDASek izugarrizko arrakasta izan zuen eta giro itzela sortu zen.


CARRASCOLIENDAS
gure herriko inauteria bihurtzen ari da. Hori adierazten du larunbatean gure herrian ikusi, sentitu eta bizitakoak. Gerra aurretik gure herriko zaharrek egiteari utzi zioten ohitura, indar biziz berreskuratu da eta iaz hasitako bidea etorkizunerako sendo azaltzen da. Parte hartzaile kopurua asko zabaldu da, umeetatik hasita gazte guraso edo adineko jende ugari bildu ginen. Mozorroak landuago eta anitzago izan ziren, etxeko trapu zaharrak eta kortinak birziklatuz, naturako elementuak baliatuz eta aurpegia margoturik edo estalirik geure identidadea ezabatu genuen eta ezezagun azaldu.

AUZOZ AUZO EGUNEZ
Dudarik gabe bereziena goizean auzoetan sortzen den giroa da. Auzoetako jendearekin harremana, dantzak, kantuak eta kontuak. Harrigarria da esker onez auzokideek nola ateratzen dizkiguten etxetik gosari eta jan-edanak. Gerra aurretiko carrascoliendas ohitura ezagutu zuten adineko jendea hurbiltzen zaigu, gazteok ohitura hau nola biziberritu dugun ikustera. Benetan oso berezia da bertan sortzen den giroa.

HERRIGUNEAN GAUEAN
Escontrilla eskolako frontoian bazkaldu ondoren iluntze aldera irteten gara herrira. Goizean sortutako energiaz beroturik giro ezin hobea sortzen da herrian. La Habana plazan egin zen carrascoliendas dantza izan zen gure herriko inauteriaren erakusgarri onena. Plaza jendez lepo beteta korroan dantzan, gelditu gabe aritu ginen DANGILISKE taldearekin! Tarantella nahikoa zail egin zitzaigun, baina ikaragarria izan zen. Trapagaranen halakorik ikusi gabe geunden!! Zerbait berezia sortu dugu, potentea, indar handia duena eta gure iraganarekin eta lurrarekin lotzen gaituena.

ONDORIOA: Gure herriko inauteria sortzen ari gara.
Gure herriko inauteria sortzen ari gara, modu benetan eredugarri batez. Trapagarango jatorrizko inauteria berreskuratu eta inauteri herrikoia sortzeko proiektua indartzen ari da. Jende askok laguntzen du antolakuntzan, partehartzea oso erreza da eta dantzaria izan ala ez edonor sartzen da dantzan. Zaharrek egiten zutena biziarazi dugu gurea bezalako inguru urbano eta zigortu batean. Gure herriko berezitasunak eta identitatea birsortzen ari gara. Gure inguruko mundu komertzialean espazio natural eta libre bat ireki dugu, harremanetan oinarritzen dena, bidea dugu egiteko. Carrascoliendas Trapagarango inauteri herrikoia. CARRASCOLIENDAS Trapagarango egiazko inauteria. ZORIONAK eta ESKERRIK ASKO GUZTIOI!

2012-02-24

Mimosa lorez mendia horitua: guztia prest dago biharko CARRASCOLIENDAS inauterirako.


Biharko dana prest! Mendiko mimosa zuhaitzak lore horiz koloreztatuak eta gu auzorik auzo etengabeko dantzan ibili, jan, edan eta kantuz aritzeko, indarrez lepo. Plastikozko gizartean, meatzaldeko hormigoi eta lantegi artean, parentesi bat ireki dugu. Bizirik gauden seinale.CARRASCOLIENDAS: Europa zaharreko inauteriaren aztarna. Eguneroko disfraza kendu eta mozorroa jantzita gu geu izateko esparrua. Beste mota bateko mundu bat nahi duten munduko herriak bezala, CARRASCOLIENDAS geurea. Bihar 10:00etan Zaballako matadero aurrean.

2012-02-20

HITZALDIA: inauteri tradizionalen berreskurapena inguru urbanoan.


Carrascoliendas-en kontextuan hitzaldia antolatu dugu carrascoliendas antolatzen dugun taldeek asteazkenerako. Trapagaranen iaz egin genuen bezala, Eibarren duela 5 urte berreskuratu zituzten bertako inauteri tradizionalak: KOKO DANTZAK. Orduz geroztik urtero urtero biziarazten dituzte Kezka dantza taldeko neska mutilek.

Guk gurea moldatu, biziberritu eta eguneratu dugun moduan, Eibarren ere egin dute haiena. Nola berreskuratu dute? Zeintzuk izan dira irizpideak prozesu horretan? eta zein da herri batentzat bere inauteri herrikoia izan eta biziaraztearen garrantzia?

Guzti honetaz solasteko, hitz egiteko, denbora tarte eder bat pasatzeko, Eibarreko Kezka dantza taldeko Oier Araolaza dantzaria izango da asteazkenean Trapagaranen. Animatu eta etorri!

HITZALDIA
Inauteri tradizionalen berreskuratzea inguru urbanoan. Eibarreko Koko dantzak.
Asteazkena, arratsaldeko 19:30etan
Olaso Jauregiko auditorioan.
Hizlaria: Oier Araolaza (Eibarreko Kezka dantza taldeko dantzaria)

2012-02-15

CARRASCOLIENDASeko bazkarirako eman izena!


Gauza badoa aurrera eta ireki da Carrascoliendaseko bazkarian izena emateko epea. 10 eurotan izango da bazkaria eta trapagarango sukaldari kuadrilla ofizialak egingo du. Bi aukera daude izena emateko:

1-Carrascoliendas dantza ikasteko ensaioetan izena ematea.
2-Egin zure lonja edo kuadrilan zerrenda eta ekarri ostiraleko bilerara edo bestela bidali e-mailez basetxegaztetxea@gmail.com helbidera.

BERRIKUNTZAZ BETETA:
Berrikuntzekin etorriko da aurtengo edizioa:

1-URIOSTEra iritsiko da aurten Carrascoliendas. Gure inauteriaren berreskuratzeko iaz egin genituen elkarrizketen artean Uriosteko adineko jendearekin hitz egin genuen. Urioste izan zen Carrascoliendas ohitura galdu zen azken lekuetako bat, horregatik antolatu dute dantza eta kantua ikasteko tailerra Uriostearrek eta horri erantzunez bertaratuko da Carrascoliendasen komitiba bertara.

2-Auzoko inauteria berreskuratuko du Ugartek. Carracoliendasekin batera auzoan galdu zen inauteria antolatu dute berriz Ugarteko auzokideek. Goizean carrascoliendas izango dira eta arratsaldean txokolatada eta mozorro txapelketa.

3-Carrascoliendas dantza ikasteko tailerra egin dute Elgeron. Motibatuta daude Elgeroko bizilagunak eta inauterian parte hartu eta murgiltzeko asmoz tailerra antolatu dute Elgeron.

4-Carrascoliendas dantzako koplak berritu ditu DANGILISKE taldeak: BaxeNafarroako "atsegin harturik nago" doinuarekin moldatu genuen iaz Carrascoliendas dantza, orain egun osoan zehar gure inauteria girotuko duen DANGLISKE taldeak koplak Trapagaranera egokitu ditu, hemen duzue nola gelditu diren.

DANTZAPLAZA eta ERROMERIA BATEKIN AMAITUKO DA CARRASCOLIENDAS

Iazko arrakastaren ondoren gure herriko berezko inauteria herrian sustraitzea da aurtengo helburu nagusia. Horretarako iluntzean DANGILISKE taldearen dantza plaza batekin eta Andoaingo INGO AL DEU taldearen erromeria batekin amaituko da aurtengo inauteria.

ANIMATU, otsailak 25 HARTU EGUNA eta MURGILDU HERRIAN!

CARRASCOLIENDAS TRAPAGARANGO INAUTERI HERRIKOIA!

2012-02-01

Carrascoliendaserako dirua lortzeko egingo da larunbatean SANTA AGEDA eskea.


Hasi dira inauteriak, Sunbillakoak (Nafarroan) izan ziren joan den larunbatean Euskal Herriko lehenengoak. Hortik aurrera Ituren eta Zubietakoak egiten ari dira asteon.

Inauterien hasiera Santa Ageda eskatzeko ohiturarekin lotuta dago ere, eskea dutelako oinarri inauteri askok. Neguaren erdian etxez etxeko eskea, udaberriari aldarri egitea, herritarrak elkartzea eta ziklo baten amaiera eta beste baten hasiera ospatzea, hori guztia da inauteria.
SANTA AGEDA TRAPAGARANEN
Santa Ageda kantatzeko tradizioa luzea da gurean, aspalditik egiten zen gure herria askoz txikiagoa zenean, auzo eta baserrietan. Gaur egun, Ugarten, Elgeron eta herrigunean bertan egiten da. Ugari dira ateratzen diren taldeak, eskola eta ikastoletako haurrak, edo auzo bakoitzean berea, baina guztietatik Escontrillako GRAPO kuadrilarenak du tradizio sakon eta luzeena herrian. Urteroko zita dute kuadrillakoek Santa Ageda bezpera. Kandela eskuan, txapela buruan eta blusa soinean, Escontrillatik hasiten dira kalerik kale Santa Ageda kantatuaz Escontrillako kuadrilla. Buelta amaitu ondoren Sokraren tabernan pintxo batzuk jan, eta ardo baten laguntzaz aspaldiko kantuak kantatzeko.

SANTA AGEDA eta AUZOLANA: Aurten CARRASCOLIENDASen ALDE.
Trapagarango Santa Ageda kantatzearen kontzepzioan AUZOLANA eta ELKARTASUNA sakonki sarturik dago. Historikoa da Santa eskean lortutako dirua herriko proiektu kolektiboei ematea. Euskararen inguruan gehienetan, ikastolaren alde bildu da dirua ikastolaren hastapenetan, AEK-eko gau eskola laguntzeko beste askotan, Korrika dagoen urteetan dirua KORRIKAren antolakuntzarako izaten da eta presoen senideei laguntzeko ere izan da beste askotan.

Aurtengoan CARRASCOLIENDASeko gastuak ordaintzeko izango da Santa Agedan lortuko den dirua, auzolanean oinarrituz, autogestioan eta herriko jendearen elkartasunean antolatzen baitira munduan dauden inauteri herrikoi guztiak, eta noski Trapagaranen, Carrascoliendas ere.

Horregatik dirua eskatzeko eta Santa Ageda kuadrillarekin joateko jendea behar da larunbatean zita jarrita dago, Etorri!:

LARUNBATA, OTSAILAK 4
17:45ean
Escontrillako funikular estazioa eta Larreinetako errepideak elkartzen diren kruzean (El "batas" lonjaren aurrean).

2012-01-15

CARRASCOLIENDASeko ensaioak hasiko dira datorren astetik aurrera.



Neguaren erdian badator udaberria eta otsailaren bukaerarekin helduko da berriro gure herriko inauteri herrikoia: CARRASCOLIENDAS.

Iaz berreskuratu genuen gure herriko ohitura zahar hau, baina errepresentaziotik haratago berezko ohiturak mantentzen dituzten munduko gainerako tokitan bezala partehartzean oinarritzen da gure herriko inauteria. Carrascoliendas gurea da eta zurea da, carrascoliendas Trapagarandarrena da, horregatik luzatzen diogu herritar guztiei gonbita. Dantzaria ez bazara baina partehartu nahi baduzu, dantza eta kantua ikasi nahi baduzu eta gure herriaren barrenean sustraitu hemen duzu aukera. Aski duzu ensaioetara etorri eta elkarrekin herrian murgiltzea:


ENSAIO EGUNAK (datorren astetik aurrera):

Astelenero 19:30etan KAPILLAN (San Gabriel)

Asteartero 19:30etan GAZTETXEAN

Asteazkenero 18:30etan KAPILLAN (San Gabriel)
Ostiralero 20:00etan GAZTETXEAN

2012-01-11

CARRASCOLIENDAS 2012: Nola egingo dugu aurten?


Badator Otsaila eta harekin batera Carrascoliendas. Nola egingo dugu aurten? Dudarik gabe iazko urtea izan zen zailena. Guztia zegoen sortzeko, asmatzeko eta egiteko. Ez genekien zer ziren Carrascoliendas eta adineko jendearengana joan ginen hura zer zen jakitera. ELkarrizketa haietatik abiatuz berreskuratu genuen gure herriko inauteri herrikoia. Prozesu hura nola izan zen gehiago jakin nahi duenak hemen du prozesu haren memoria gisa ikuspegi etnografiko-kulturaletik idatzi genuen artikulua:

CARRASCOLIENDAS: INAUTERI HERRIKOI TRADIZIONAL BATEN BERRESKURAPENA INGURU URBANO MODERNOAN:
http://issuu.com/basetxegaztetxea/docs/las_carrascoliendas_memoria


AURTEN ZER eta NOLA?
Otsailaren 25ean izango da Carrascoliendas eguna aurten. Guretzat inauteria ez da desfile eta ez da tradizio, guretzat inauteria barnean duguna adierazteko beste molde bat da, elkar harremanean oinar. NEguaren baitan udaberria datorrela esateko molde bat.

Iazkoan gure inauteri herrikoia sortu genuen eta aurten konsolidatu. Data ordea gainean dugu eta asko dago egiteko. Ideia berriak lantzeko, autogestioa nola egingo dugun pentsatzeko, ensaio egunak zein izango diren erabakitzeko, zein auzotara joango garen... Hau guztia definitzeko eta lanak banatzeko bilera egingo dugu ostiralean gaztetxean.

CARRASCOLIENDAS 2012, NOLA?
Urtarrilak 13, ostirala
20:15ean basetxe gaztetxean

2011-03-15

CARRASCOREN biharamuna: Butterfly effect.

Txinako esaera zahar baten arabera "Tximeleta batek hegoak mugitzean sortzen duen aire bolada txikiak, tsunamia eragin dezake Munduaren beste aldean". Esaera hori hartzen da oinarri butterfly effect azaltzeko. Azkenean gauza txikiek aldaketa handiak sorrarazi ditzaketela hainbat faktore nahastu eta gauzatzen badira.

Gauza txiki bat izan da Carrascoliendas inauteria, beti izan dugu ondoan, ixilean gure zaharren buruetan. Orain aldiz konturatu gabe eta hortik abiatuz Trapagaranerako inauteri herrikoi bat sortu dugu. Hamaika sentimentu, sentsazio, oroitzapen eta ondorio artera daitezke larunbatekotik. Zer izan zen guztia hain berezi egin zuena? Horrela sentiarazi gintuena?

Auzoak
Larunbatekoa ez zen posible izango auzoetako elkarte eta jendearen laguntzarik gabe. Auzoetan egin ziguten harrera. Sortu zen giro berezi eta goxoa zein eskaini zizkiguten janari eta edariak. Benetan eskerrik asko Club Zaballa, Ugarteko auzo elkartea eta Elgeroko Aldapa elkarteari. Zuek ematen diozue bizia zuen auzo eta txokoei. Zuek eman zeniguten hurbiltasuna eta etxean bezala sentitzeko aukera. Zuek gabe martzianoak ginateke zuen auzoetan.

Euskal kultura
Zer da euskalduna izatea? Galdera handia benetan. Zailtasun asko dauzkagu euskaraz bizitzeko, gure gurasoak ez dira euskaldunak, erdaraz aritzen gara etxean, erderaz gehienetan lagun artean. Zaila da, larunbatean ordea errazago egin zitzaigun. Nork esan bertsolaria geure barnean zegoenik, kantaria, dantzaria. Folklorea baino gehiago, joan den egunean sentitu genuena herrikoitasuna izan zen. Hurbiltasuna. Musika eta dantza.

Euskal kulturak, euskaldun izateak ematen digu hau guztia bizi eta disfrutatzeko aukera gero eta uniformizatuago den mundu komertzialean. Europatik Euskal Herrira etortzen diren ikerlariek, soziologoek beti nabarmentzen dute Euskal Herrian nola bizi dugun belaunaldi ezberdinak elkarrekin ibiltzen garen. Arraroa egiten zaie nola elkarrekin gabiltzan adin ezberdinetako jendeak, jaietan, bazkarietan edo berdin protestaren barrikadan. Ez omen da ohikoa mundu modernoan. Gurean ordea gazte zein guraso, eta haur, elkarrekin ibili ginen egun osoan zehar bikain.

Musika eta traktorea
Gaurko munduan dirua guztiaren oinarri dela sinestarazi nahi diguten honetan, nola ulertu larunbatekoa? Kriston soinu ekiporik gabe, argi handirik gabe, jendea libre giroan sarturik. Jendearen arteko harreman eta laguntasunak egin zuen guztia. Musikariak izugarri aritu ziren, gustura eta kriston egurra ematen eta jendea ero moduan. Zer esan traktoreaz? Trapagaranen baserritarrak izateagatik daukagula egiazko esnea eta traktorea. Durañonatik etorrita. Musikariak zein traktore gidaria, herriko jendea, jende herrizalea. Ederto pasatu genuen! Eskerrik asko benetan!

Telefono dei bat baino gehiago jaso dugu igandean eta astelehenean. Baten aitite kantua kantatzen hasi dela eta ez zekiela haren aititek hori ere kantatu zuenik gaztetan! Elgeron ere zahar batek baino gehiagok oroitzen duela kantua orain. Ugarten ere azaldu zen baten bat gaztetan kantatu zuela eta letra eske.



Hego Amerikako olerki batek dio mundua su txikien itsasoa dela. Mar de fueguitos. gu geurea pizten ari ari gara. Herri egiten gaituen sua. Non eta industrializazioak guztia arrasatu zuen eskualdean. Butterfly effect, mugimendu txiki batek beste handiago bat sortzen duela eta gurean mugimenduan bagaude, mugimenduan bagoaz. Aupa peña! Larunbatekoa ederra izan zen! Egiazkoa!

2011-03-09

Badator! larunbatean: CARRASCOLIENDAS eta kristona izango da!

Hainbeste buelta eta ensaio, dantza asmatu eta mozorro muntatu, auzo elkarteei proiektua aurkeztu, udaletxeko permisoen harresia gainditu (kostatu zaigu baina pilarica eta aita santuaren baimena ere bai!! Badugu!)... eta azkenean badator eguna eta larunbatean irtengo gara kalera CARRASCOLIENDAS kantatzera. Aurreko ostiraleko ensaioan 100 lagun baino gehiago bildu ginen! plaza bete genuen! Seguru gaude kristona izango da!

Carrascoliendas XXI spota


Herrikoitasuna eta partehartzea oinarri
Azken hilabeteetan gure herriko zaharrenak elkarrizketatu ditugu. Inauteria gerra aurretik (1936) Trapagaranen nola egiten zuten kontatu digute. CARRASCOLIENDAS kantua nola kantatzen zuten. Nola etxez etxe eskean aritzen ziren eta ondoren elkarrekin bazkaria egiten zuten. Mozorrotuak joaten ziren Uriosten eta mozorrotu gabe Trapagaranen. Oilar beltz bat lagun.



Zaharrek esplikatu digute inauteria traje desfile bat baino gehiago dela. Haientzat egiazko inauteria: Egun osoan zehar lagunekin kalean egotea da, mozorrotuta gizarteko presio eta mugetatik kanpo zu zeu izatea. Funtsean herriko jendearen arteko harremanak dira inauteria, elkartu eta gustura ederrean herrian egotea. Hori da hain zuzen berreskuratu nahi duguna. Lehengo ohitura zaharra berreskuratzea baino, gaurko Trapagaranera egokitutako inauteri herrikoia sortzea dugu helburu. Intergenerazionala, zahar, guraso, haur eta gazte elkartuko dituena. Horregatik asmatu dugu "Trapagarango inauteri dantza" izango dena. horregatik etorriko da txaranga gurekin egun osoan, horregatik mozorrotuko gara.

DOKUMENTAZIOA etxez etxe buzoneatu den aldizkaria PDF: http://euskalherria.indymedia.org/eu/2011/03/72653.shtml

Egun osorako alternatiba
Egun osoan arituko gara kalean, goizean auzoetan eta arratsaldean herrian. Gauean berriz tabernetan mozorrotuta egoteko ohitura sortu nahi dugu. Udaletxeak desfileaz gain ez du ezer gehiago antolatzen eta herriko gazteak beti alboko herrietara bideratzen gaituzte. Guk ordea gure herrian egon nahi dugu, inauterian ere bai.

Auzoak
Auzoz auzo arituko gara udaletxeak auzoak abandonatuta dituelako eta bertan kultur ekimenik egiten ez dituelako. Horregatik izan da auzo elkarteen harrera hain ona eta inplikazioa izugarria. Auzoetako bizimodua gainera ezberdina da, harreman zirkulu txikiagoak dira, herrikoiagoak, elkar ezagutu, elikatu eta piztuko ditugu!

Euskaraz far westen ere bai!
Elkarrizketatu ditugun zaharrek ez dute euskaldunik ezagutu herrian. Are gehiago oso ondo egiten dute ezberdintasuna eta hitz egiterakoan "vasco" deitzen diote euskara dakiten eta Eskuinaldetik edo Txorierritik etorri ziren eta euskara zekiten auzokideei.
Aspaldi galdu zen euskara gure herrian, orain 200 urte inguru. Orain ordea gazte guztiek dakigu euskara, euskaraz bizi nahi dugu. Horregatik kantua bere baitan, erdaraz mantendu, baina herriko bertsolariak arituko dira koplatan auzoetako gora beherak kantatzen. Gero eta gehiago euskaraz ari garelako, Euskal Herriko far westen ere bai!

Euskal Herriko kultur berreskuratze prozesuarekin bat.
Euskal Herria kultur dinamika indartsuko lurraldea da. Euskal Herriak estatu independienterik ez izateak kultura bultzatzeko tresna ofizialik ez izatea ekarri du. Ondorioz kulturaren transimisioa eta sorkuntza herriak hartu du bere gain geurean. Horrela sortu dira Euskal HErrian hamaika kultur ekimen, asmakizun, ideia, proiektu.

Ez gara bakarrak inauteri zaharrak berreskuratzen edo inauteri herrikoiak sortzen. Hor daude Eibarren duela 3-4 urte sorturiko KOKO ESKEA, Lesakan aurten berreskuratu duten mairu eta kristauak edo Anhauzeko inauteriak. Gureak ere bai, CARRASCOLIENDAS! Larunbatean danok kalera!

2011-03-02

Senegaletik Errumaniara: bertan ere CARRASCOLIENDAS

Xiberuan egon ginen pasa den asteburuan gaztetxeko hainbat lagun. Xiberuko inauteri herrikoia, maskarada, ikusten. Bertan kontatu ziguten nola Baxe Nafarroan inauteritan etxez etxe kantuz eta mozorrotuta joateko zegoen ohitura herri askotan galdu zen. Hala ere, hor ere bai, ari dira gazteak ohitura zaharra berreskuratzen. Kontu kontari geundela guri carrascoliendas etorri zaigu berehala gogora. Euskal Herrian ohitura zen inauteri garaian eskean etxez etxe aritzea. Ezker eta eskuin, ipar eta hego, han eta hemen.

Errumanian ere bai badute bere inauteri propioa: TZIGANOAK deitzen dira. Inauteri honek diotenez, badu Xiberuko maskaradarekin antzekotasunik, antzerki, parodia, basatikeria eta halakorik. Bata zein bestea, haiena zein gurea, antzinako gizakiaren mundu ikuskeraren parte. Ordena desordenaren arteko borrokaren parte, gizarteko mailen arteko borrokaren parte.




CDak saltzen ari den senegaldarra heldu zaigu gero eta esplikatu digute nola TAJABON egiten duten bere herrian. Neguaren amaieran Tajabon kantatuz aritzen dira haurrak, musikaz, kantuz, dantzan, etxez etxe janari eskean. Musulman ohitura erlijiosoen barne baina lehenagoko berezko mundu ikuskeraren parte.



Euskal Herritik mundua eta mundutik Euskal Herria. Tajabon eta Carrascoliendas. Badira loturak, lehenagoko natur mundu horrek emaniko harremanak. Izan Wolof edo Serer , geu bezala elkarrekin sortzen ari baikara geure Tajabon, lehengo gure zaharren carrascoliendas, baina aldi berean gaurko munduan sarturik. Bizitzeko, murgiltzeko, sentitzeko. Ensaio orokorra egingo dugu etzi, animatu guztiok! Guraso eta haur, zahar eta gazte:

CARRASCOLIENDAS ENSAIO OROKORRA
OSTIRALA 19:30etan
La Habana plazan

2011-02-24

CARRASCOLIENDAS: Bideoaren aurrerapena



Carrascoliendas XXI spota

Hemen dago Trapagarango antzinako inauteriei buruz gure herriko agureekin egin dugun elkarrizketetak muntatzen ari garen bideoaren aurrerapena. Eguna hurbiltzen ari da eta badoa gauza aurrera!

ENSAIO OROKORRA
Ensaio orokorra egingo da martxoaren 4ean ostirala iluntzeko 19:30etan La Habana plazan. Txaranga, dantzari eta kopla-bertsolariekin. Apuntatu eguna agendan!

LAGUNITA MENTAL in live KONTZERTUANMartxoaren 12an, Carrascoliendasekin eguna amaitzeko, inauteri giroa, giro herrikoia, kalea berreskuratzeko, LAGUNITA MENTAL (flamenkore marginal) taldearen kontzertuarekin amaituko da eguna Ilargi tabernan. Prestatu zure mozorroa. Zabaldu bideoa eta hartu eguna!